Kom ons kyk na agter die Classics-gordyn met Barry Pretorius

Die skouspelagtige Classics is Junie terug in Pretoria en musiek word vanjaar gevier. Ons het agter die gordyn gaan inloer en met Barry Pretorius, kreatiewe regisseur van die konsert gesels.

Wat is Classics, die konsert?
Classics is ’n viering van die grootste pop, rock en musiekblyspel treffers van álle tye. ’n Absolute extravaganza van klank, talent en nostalgie. Die kunstenaars in Classics is van ons land se voorste sangers en met ’n vol simfonie-orkes, wêreldklas dansers en die beste tegniese span in die industrie, beloof Classics om weereens asems weg te slaan.

Wanneer beplanning vir so ’n konsert afskop, waarmee begin julle gewoonlik eerste?
Dit neem sowat ’n jaar om Classics te vervaardig – alles van konseptualisering tot repertoire tot verwerkings en dan uiteindelik repertisies. Net die skryf en verwerking van die musiek neem sowat ses maande. Ons is ’n reuse span wat op die produksie werk. Ons musiekdepartement is van die gerekendste in die land en ons tegniese verskaffers dwing op alle vlakke respek af.

Hoe besluit julle watter items op die program moet wees?
Daar is ’n skatkis van treffers en liedjies so dit is ’n onuitputbare bron. Ek, as regisseur sit saam met die musikale regisseurs, Floors Oosthuizen en Devereaux van der Hoven en stel ’n werkbare konsert saam. Ons lê dit dan aan die kunstenaars voor en hulle bring hul idees en konsepte. Dis werklik ’n reuse spanpoging om ’n goeie repertoire-lys saam te stel.

Waarom mag mense nie Classics 2018 misloop nie?
Ons doen hoogtepunte uit The Greatest Showman wat die afgelope paar maande die wêreld op hol het. Nie eens om the praat van items uit The Lion King, Cats of selfs van Queen, Abba en Elton John se grootste treffers nie. Dit is werklik die grootste huldeblyk-skouspel in Suid-Afrika.

Enjoyed this post? Share it!

 

Leave a comment